बीड : जिल्ह्यातील कायदा व सुव्यवस्थेवर प्रश्नचिन्ह निर्माण झाले असून, बीडमध्ये गुन्हेगारीचं मूळ अधिक खोलवर रुजल्याचे दिसते. आता पुन्हा एकदा बीडमधून एक धक्कादायक बातमी समोर आली आहे.
भांडण मिटवण्यासाठी गेलेल्या एका व्यक्तीला तू आमचा वाद का मिटवतोस? असा सवाल करत तिघांनी बेदम मारहाण केल्याची घटना भेंड टाकळी (ता. गेवराई) येथे घडली. मारहाण झालेल्या व्यक्तीचे नाव सतीश वाव्हाळ असे असून, या प्रकरणी तिघांविरोधात तलवाडा पोलीस ठाण्यात गुन्हा दाखल करण्यात आला आहे.
गावातील दोन भावांमध्ये वैयक्तिक कारणावरून वाद सुरू होता. या वादाचे गांभीर्य वाढत असल्यामुळे सतीश वाव्हाळ यांनी मध्यस्थी करण्याचा प्रयत्न केला. मात्र, वाद सोडवण्याच्या हेतूने गेलेल्या सतीश यांच्यावरच तिथे उपस्थित असलेल्या तिघांनी राग काढला. तू आमच्या वादात का पडतोस? असा जाब विचारत त्यांना लोखंडी रॉड व लाथाबुक्क्यांनी बेदम मारहाण करण्यात आली. यात सतीश वाव्हाळ गंभीर जखमी झाले असून त्यांना उपचारासाठी रुग्णालयात दाखल करण्यात आले आहे.
या प्रकरणी तलवाडा पोलीस ठाण्यात तक्रार दाखल करण्यात आली आहे. पोलिसांनी तीन जणांविरोधात गुन्हा नोंदवला असून, आरोपींचा शोध सुरू आहे. मारहाणीच्या या प्रकारामुळे गावात भीतीचे वातावरण निर्माण झाले आहे. बीड जिल्ह्यात अलीकडच्या काळात मारहाणी, वादविवाद आणि हिंसक घटनांमध्ये वाढ झाल्याचे चित्र दिसून येत आहे. बीड जिल्ह्यातील वाढत्या गुन्हेगारीला आळा घालणे हे पोलिसांसमोर मोठे आव्हान आहे.
भावकीचा वाद मिटवायला गेला अन् बेदम चोपला
